ಮೈಸೂರು, ಫೆ.೧೧ – ಅಮಿತ್ ಶಾ ವಲ್ಲಭಬಾಯಿ ಪಟೇಲರಂತೆ ಉಕ್ಕಿನ ಮನುಷ್ಯ. ಇನ್ನು ಪ್ರಧಾನಿ ನರೇಂದ್ರ ಮೋದಿ ಗೃಹ ಸಚಿವ ಅಮಿತ್ ಶಾ ಅವರು ದೇಶ ಮುನ್ನಡೆಸುತ್ತಿರುವ ಜೋಡೆತ್ತುಗಳು ಎಂದು ಸುತ್ತೂರು ಮಠಾಧೀಶ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಹೇಳಿದರು.
ಸುತ್ತೂರು ಕ್ಷೇತ್ರದಲ್ಲಿ ಶಾಸಕ ಶಾಮನೂರು ಶಿವಶಂಕರಪ್ಪ ಕುಟುಂಬದವರು ನಿರ್ಮಿಸಿರುವ ಪಾರ್ವತ್ಮ-ಶಾಮನೂರು ಶಿವಶಂಕರಪ್ಪ ಅತಿಥಿ ಗೃಹವನ್ನು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಉದ್ಘಾಟಿಸಿದರು.
ವೇದಿಕೆ ಕಾರ್ಯಕ್ರಮದಲ್ಲಿ ಸುತ್ತೂರು ಮಠಾಧೀಶ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿಗಳು ಮಾತನಾಡಿ, ” ಅಮಿತ್ ಶಾ ಅವರು ಸರ್ದಾರ್‌ ವಲ್ಲಭಬಾಯಿ ಪಟೇಲರಂತೆ ಉಕ್ಕಿನ ಮನುಷ್ಯ ಹಾಗೂ ಚಾಣಕ್ಯನಂತೆ ದೇಶದ ಏಕತೆ ಮತ್ತು ಸಮಗ್ರತೆಗಾಗಿ ಹಲವು ಗಟ್ಟಿ ನಿರ್ಧಾರಗಳನ್ನು ಕೈಗೊಂಡವರು. ಭಾರತೀಯರು ಊಹಿಸಲೂ ಸಾಧ್ಯ ಇರದಂತಹ ನಿರ್ಧಾರಗಳು. ಪ್ರಧಾನಿ ನರೇಂದ್ರ ಮೋದಿ ಮತ್ತು ಅಮಿತ್ ಶಾ ಅವರು ದೇಶವನ್ನು ಮುನ್ನಡೆಸುತ್ತಿರುವ ಜೋಡೆತ್ತುಗಳಂತೆ ” ಎಂದು ಶ್ಲಾಘಿಸಿದರು.
ಸುತ್ತೂರು ಜಾತ್ರೆ ಸುತ್ತಿದ ಅಮಿತ್ ಶಾ
ಶ್ರೀಕ್ಷೇತ್ರ ಸುತ್ತೂರಿನಲ್ಲಿ ನಡೆಯುತ್ತಿರುವ ಜಾತ್ರಾ ಮಹೋತ್ಸವದಲ್ಲಿ ಭಾನುವಾರ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಭಾಗವಹಿಸಿದರು. ಸುತ್ತೂರು ಮಠದ ಸೇವಾಕಾರ್ಯದ ಬಗ್ಗೆ ಅವರು ಕೊಂಡಾಡಿದರು. ಜಗಜ್ಯೋತಿ ಬಸವಣ್ಣನವರನ್ನು ನೆನೆದು ಅಮಿತ್ ಶಾ ಭಾಷಣ ಶುರು ಮಾಡಿದರು. ಸುತ್ತೂರು ಮಠದ ಈವರೆಗಿನ 24 ಸ್ವಾಮೀಜಿಗಳಿಗೆ ಪ್ರಣಾಮ ಸಲ್ಲಿಸಿದರು. ಸ್ವಾಮೀಜಿಗಳ ನಿಸ್ವಾರ್ಥ ಸೇವೆಯಿಂದ ಹಲವರ ಬದುಕಿನಲ್ಲಿ ಬೆಳಕು ತರಿಸಿದ್ದಾರೆ ಎಂದರು.
ಅಹಮದಾಬಾದ್‌ನ ಕಾರ್ಯಕ್ರಮ ರದ್ದು ಮಾಡಿದ್ದಕ್ಕೆ ಅಲ್ಲಿನ ಪತ್ರಕರ್ತರು ಸುತ್ತೂರಿಗೆ ಯಾಕೆ ಹೋಗುತ್ತಿರುವಿರಿ ಎಂದು ಪ್ರಶ್ನಿಸಿದರು. ಅದಕ್ಕೆ ನಾನು, ಭವ್ಯ ಕಟ್ಟಡದ ಉದ್ಘಾಟನೆಗೆ ಮಾಡಲು ಎಂದು ಹೇಳಲಿಲ್ಲ. ಸುತ್ತೂರು ಶ್ರೀಗಳ ಆಶೀರ್ವಾದ, ದರ್ಶನ ಪಡೆಯಲು ಹೋಗುತ್ತಿರುವುದಾಗಿ ತಿಳಿಸಿದೆ” ಎಂದು ಹೇಳಿದರು.
”ಸುತ್ತೂರು ಮಠದಿಂದ ವಿಕಲಚೇತನರಿಗೆ ವಿಶೇಷ ಪಾಲಿಟೆಕ್ನಿಕ್ ಇನ್‌ಸ್ಟಿಟ್ಯೂಟ್ ಸ್ಥಾಪಿಸಿದ್ದಾರೆ. ಸಾವಿರಾರು ಸಿಬ್ಬಂದಿ, ಲಕ್ಷಾಂತರ ವಿದ್ಯಾರ್ಥಿಗಳು ಹಾಗೂ ಸಂಸ್ಥೆಗಳನ್ನು ಸುತ್ತೂರು ಮಠವು ನಡೆಸುತ್ತಿದೆ” ಎಂದು ವಿದ್ಯಾಕೇಂದ್ರವಾಗಿ ಬೆಳೆದಿರುವ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದರು. ಅಯೋಧ್ಯೆಯಲ್ಲಿ ಪ್ರತಿಷ್ಠಾಪನೆಯಾಗಿರುವ ಬಾಲರಾಮನ ಮೂರ್ತಿ ಕೆತ್ತಿರುವ ಶಿಲ್ಪಿ ಅರುಣ್ ಯೋಗಿರಾಜ್ ಅವರಿಗೂ ಇಲ್ಲಿ ಸನ್ಮಾನ ಮಾಡಲಾಗಿದೆ ಎಂದರು.
